طير

النصيب لما يصيب

لايفرق بين بعيد و لا قريب

يوهب العاشق ملاك

و يملك القلب هواك

يوهبك مليون جناح
يصبح العالم براح

بس طير

افرد جناح منهم و طير

أعلى و أوصل للقمر

و انثر نجوم الليل قُبل

أخطف حبيبك من الزمان

خليه يعيش لحظة أمان

موال

حلم

بدور على نفسى الاقيك
حلم و تاهت فيه

منى عنيك
قلب صغير يرعش خوف
أمل و حياه و نفس مخطوف

حلم قديم كنت نسيته
و كلام حلو كتير غنيته
بس عنيك هى اللى جبتنى
و خلتنى

حرجع تانى اسكن بيته

اهو ده حالى

بدور على السعاده زيك

بفتح عينيه كل يوم حزينه

اشوف الدنيا بعيون ضعيفه

مش قادره تتحمل النور

اقوم كسلانه بدور على خطوتى

احاول اغسل غيوم بتهز الصور ادامى

بس ايدى مبطلش الميه

ادور على صوت دافى او لمسة ايد اتعلق فيه او فيها

علشان احس انى موجوده

انى صحيت من كابوس كنت فيه طايره

كابوس لانى مش قادره احط على ارض

سعات بتمنى اشوفك فى الحلم و سعات بخاف لتجيلى غضبان

لسه بحبك ؟

هو الحب بينتهى..طب .بيتحول..!!!مش عارفه

و مش عايزه اعرف

لكن متأكده انى مشتقالك

سامحنى

بحر هادى زى سجاده قطيفه زرقه

مغزوله بخيوط القمر

و انا وانت ماشين على الكورنيش

بنحكى من غير صوت

والوحيد اللى كان فاهمنا هو

هادى يوم ما تكون هادى

عالى وغضبان مع غضبك

حتى وأنت بتغازل عيونى بضحكتك كان بيغازل عيونى بانعكاسات الضوء عليه

تكونشى انت فعلا البحر

يبقى انا عروسة البحر

كنا غرقانين يا بحرى فى حكايه من حواديت الخيال

مع نجمه و بحر و قمر

الليل بيخبى حجات كتير

بس دايما النهار بيفضح الخيال

يجرى يستخبى فى بطن البحر ويستنى ليل تانى

بس انا مقدرتش استنى الليل الجاى

سامحنى

وحشتنى

وحشتنى يا قمرى المستخبى ورا عيونه الطيبه

و رموش عيونه اللى بتاخد طيفى فى حضن يدوبنى فى حنيته

**********

معدليش غير الكتابه ليك و عليك

اتخيل انك لسه بتحبنى و ان لسه فيه حبل هوى ممدود بينى و بينك ماتقطعش

جسر مغزول بضياك الفضى ممدود بطول البحر

ميسمحش غير للى زينا انهم يمشو عليه و يوصلولنا

**********