صوتك
بيحى فرحه قديمه مخلوطه بشجن و يموَت الخوف اللى ساكن من زمن
فرحة وليد قلبه عمر مانجرح
و حزن شيخ حلمه ا ٌدامه اندبح
بيصحى شوقى لحلم كان
بس انتهى قبل الاوان
فى ثانيه بين صمتك و صمتى بتتولد... لحظة امان
و كأن كل الكون سكت
و فى السكون مفيش ....غير بنت وولد
حاضنين ايدين بعضهم
ماشين على البحر اللى راضخ فى اللحظه دى لسرهم
بنت وولد و الكون امان
و لا فيه ملايكه و لا شيطان
و لا حِسبه لازم تتحسب
ولا باب مقفول و اربع حيطان
بنت و ولد و الكون امان
و لا حِسبه لازم تتحسب
ولا باب مقفول و اربع حيطان
بنت و ولد و الكون امان
بس صوتك بيختفى
و النور فى قلبى بينطفى
وفى ثانيه ارجع لوحدتى
و الخوف بيقفل كل البيبان
4 comments:
هبة الاسكندرانية ... صباح .. البحـر
,.
.
لولا إن منير غنَّى ( صوتِك) وكانت رااائعة ، لقلت إن قصيدتك دي تماثلها في الروعة ،،،
.
.
واااضح إن عندك حس شعري عالي ، وتمكن من الأوزان ، يعني في انتظـار شاعرة عامية (مدونة) سكندرية جديدة ، وده مش بس ع القصيدة دي ، و إن كنت أراها أجودهم ، لكن على عموم شعرك في حبيبة القمـــر
.
.
و قطعًا .. يا بخته
شكرا يا ابرهيم انا بحب اغنية صوتك لمنير و سعيده بالمقارنه دى
و اتمنى اكون زى ما انت بتقول
و قطعا..شكرا:-)
هادية زي صوت البحر على الساعة 6 كده ..وحسستني بنفس إحساس الصفاء
قريتها وانا باسمع مقطوعة جيتار باعشقها ..فكانت حالة ممتازة .. بجد تسلمي يا هبة .
بس بصراحة قبل ما أقراها ..شدت عينيا أوي الصورة..الصورة حلوة أوي ..ولما قريتها شوفت الصورة بعين تانية ..
ياترى الصورة هي اللي أوحت لك بالقصيدة ؟ ولا القصيدة جت ..وبعدين دورتي لها على صورة ؟
في انتظار أكتوبرياتك .
حسن
جميله قوي
"بنت وولد و الكون امان و لا فيه ملايكه و لا شيطان
و لا حِسبه لازم تتحسب
ولا باب مقفول و اربع حيطان
بنت و ولد و الكون امان"
فظيعه قوي الحته دي
يا سلام لو يبقى صحيح حسبه تتحسب
والكون امانت
تحياتي يا جميله
سلاااااااااااااااااااام
Post a Comment